كلنا متفقين أن أحسن نهار عند أي بنت هو نهار لي كتزوج فيه وكتمشي لدار رجلها خصوصا فاش كتزوج عن حب ❤️ولكن تصوري معايا إكون هاذ النهار هو أكفس نهار فحياتك😱
 |
غدي نبداو القصة ديالنا في مدينة الدار البيضاء هنا فين غدي نمشيو عند واحد الأسرة مغربية تتكون من أربعة أفراد الزوج لي سميتو حميد والزوجة لي سميتها فتيحة وعندهم جوج أليدات كريم هو الكبير وحنان هي الصغيرة عيشين فواحد الحي شعبي وحياتهم والمستوى المعيشي ديالهم كان مزيان .
حميد خدام رجل تعليم فعمرو 36سنة ،تعرف على فتيحة في حفلة التخرج حيث الزوجة ديالو فتيحة حتى هيا معلمة والزهر لي عند حميد أن فتيحة خدمات فنفس المؤسسة لي فيها حميد تما فين تقدم ليها وطلبها للزواج ملي كانت فعمرو 30سنة .أما فتيحة كان فعمرها داك الحين 28سنة .
حميد وفتيحة تزوج وخدامين فنفس المؤسسة يعني أمورهم كانت بخير وعلى خير ،العام الثاني من بعد الزواج غيرزقهم الله بمولود ذكر فرحو بيه وسماوه كريم .دازت عامين على الزيادة ديال كريم غدي تعاود تحمل الزوجة للمرة الثانية وغدي ارزقهم الله ببنت وسماوها حنان .هنا قررت فتيحة وحميد إكتفيو بهاد جوج وليدات إكبروهم ويقريوهم ويوصلوهم لداكشي لبغاو.بالفعل وليداتهم كبرو دخلوا إقراو وكانوا متوفقين فدراستهم .
كريم كبر وشد البكالوريا ديالو بمعدل مزيان هنا فين كان التوجيه دالوا هو التعليم حيث الأب ديالوا حميد ديما كيكول لوليداتو بجوج الأمنية ديالو هو إشوفهم أساتذة ،في هذه اللحظة حميد كان فرحان بزاف حيث ولدو غدي إولي أستاد .
من بعد عامين حنان حتى هي غذي تفوق وغدي تنجح فالكالوريا بمعدل مزيان ،حنان غذي دير بتوجيه لي قال ليها بابها التعليم بحال خوها كريم .هنا كملات الفرحة ديال الوليدين وبداو كيحسو بلي قربو إكملوا الواجب ديالهم .
كريم تخرج وتعين أستاد في مدينة أكادير ،مشا تما وساكن مع شي دراري صحابو في نفس المؤسسة مهم الأمور ديالو غاديا مزيان .الفرحة ديال وليديه كانت كبيرة بزاف الأمنية ديالهم تحققت الحمدلله.أما بالنسبة إلى حنان من بعد حتى هي غتخرج وغدي تعين أستاذة في مدينة سطات .حنان الزهر لي عندها هو أن عندها عمتها في مدينة سطات غدي تمشي تستقر مع عمتها فدارها مهم الأمور ديال على أحسن حال.
حنان في هذا الوقت كان فعمرها 28سنة مهم بدات كتخلص مزيان شرات طموبيل والحالة المادية ديالها مزيانة ،مهم سلى الموسم الدراسي ورجعت حنان إلى مدينة الدار البيضاء عند وليدها باش تدوز معاهم العطلة.
كتقول حنان واحد نهار كالسة في بيتي جاء عندي بابا قال ليا بغيت نهدر معاه أبنتي قلت ليه مرحبا بابا قول كنسمعك ؟قاليا واش عقلتي على الأستاذ الهاشمي ديال مادة اللغة العربية؟قلت ليه اه عرفتو مالو! قلي تلقيتو اليوما وقال ليا بلي بغاك تكوني مرات مولدو حيت ولدو كلف باباه إلقا ليه شي بنت الناس قال ليا مغديش نلقا بحال بنتك حنان مربية ومتخلقة وكبرات قدام عيني .من تبعت الحال أبنتي القرار الأخير كيرجع ليك أنا ميمكنش ليا نبزز عليك شي حاجة نتي مبغيتهاش.صراحة أنا حشمت حيت معمري عطيت فرصة لشي شاب إدخل حياتي مهم أنا كنتيق فبابا عرفتو مجاش عندي حتى متيقن أن هاذ الشاب مزيان وصالح ليا.قلت لبابا لي شفتي فيها مصلحتي ديرها أنا قابلة .قال ليا الله إرضي عليك أبنتي🤲🏻
أنا كنت مرتبكة بزاف حيت معمري مدرت شي علاقة مع شي حد من قبل ،حيت ماما كانت ديما كتوصيني نديها فقرايتي ونضمن مستقبلي ولى شي شاب بغاني بصاح وبغا المعقول غيدير مدار بابا مع ماما .بقات هذه الهضرة ديما فبالي .
النهار السبت بالعشية جاء عندنا عمي الهاشمي وخالتي السعدية وجاء معاعم ولدهم منعم ،مهم دازت اليلة بخير وعلى خير شفت منعم وحتى هو شافني عمي الهاشمي وبابا تفاهمو على نهار الخطوبة وقرروا فعطلة الربيع نديرو الخطوبة وفي الصيف العرس .مهم بقيت كنهدر أنا أمنعم في التلفون وكنتعرفو على بعضنا ومرات كنتلقاو كان هو كيجي عندي حتى لمدينة سطات فين خدامة باش إشوفني حيث منعم خدامتو كتسمح ليه حيت هو كان كيبيع وكيشري فدهب ،مع الوقت بديت كنرتاح ليه وبديت كنحس بشي حاجة من جيهتو .
جات العطلة ديال الربيع وجاء منعم وجاب ولديه وتقدم ليا رسميا دار ليا الخاتم وداز كلشي بيخير وعلى خير ،كان كلشي فرحان حتى صاحبتي زينب كانت معايا وفرحات ليا بزاف ،هذه زينب أعز وحدة عندي صديقة الطفولة مكنخبي عليها والو أحتى أنا صارحة كنت حاسة بواحد الإحساس معمري محسيت بيه كنت كنحس براسي بحال شي فراشة 🦋….
مهم سلات العطلة ورجعت لخدمتي وبقيت أنا ومنعم نهار كلو فتلفون ديما كيسوني ليا وبعض المرات كيجي إشوفني .صراحة فالاول مكنتش كنبيغ واحد نهار سولاتني صحبتي زينب واش كنبغي منعم قلت ليها لا قالت ليا مع المدة غدا تبغيه . دكشي نيت لي وقع دابا وليت كنبغيه بزاف وكنتسنا غير إمتى نتزوجو هو مربي وضريف بزاف هدشي لي خلاني نبغيه ونتعلق بيه.
إنتهى الموسم الدراسي وجاء موعد 📅 لي تفقنا عليه نديرو فيه العقد والعرس مهم قبل مدرنا العقد مشيت أنا ومنعم نعتيو العربون فالقاعة لي غنديرو فيها العرس وشفنا النكافة كيما كتعرفو الصيف كيكون كلشي عامر مهم بدينا كنوجدو كلشي وكنعرضو على العائلة والأصدقاء كلشي غدي مزيان.ليلة قبل من العقد كنت فرحانة بزاف وليلة كلها مجنيش نعاس بالإرتباك والفرحة ،الغذ في الصباح مشيت لعند العدول أنا وماما وبابا شويا جاو وليدين منعم عمي الهاشمي وخالتي السعدية قالو لينا منعم ها هو شويا جاي ،مهم بقينا مجمعين كنتسناو منعم تعطل بزاف صونيت ليه نمرتو طافية تخلعت بدينا كنصونيو عليه كاملين ولكن والو التلفون باقي طافي شي 3ساعات وحنى غير كنتسناو وكنصنيو والو ،متخيلوش حالتي أنا كدايرة دموعي حابسهم غير بزز .خرجنا من عند العدول عمي الهاشمي قال لبابا غنمشي نشوف الكومسرية والمستشفى لي ماين نقولو ليك في التلفون قاليه بابا الله إسمعنا خير . مشينا لدرنا كلشي ساكت أنا دخلت لبيتي وبقيت كنبكي ديك الفرحة لي كانت فدار ولات بالعكس بحال إلا عندنا العزو واحد الإحساس خايب بزاف 😭💔.
الغد ليه فصباح عمي الهاشمي صونا لبابا هنا فين الصدمة الكبرى قال ليه راه صونا ليا منعم وقال ليا راه هو فطنجة وقال ليا ممستعدش لزواج عفاك أصاحبي سمحليا أنا براسي تصدمت من هدرتو معرفتش علاش ولدي دار هكا 😱بابا قاليه معمرك مزل تصوني ليا إصحابلي نتا راجل وكلمتك مسموعة ساعة نتا والو غير شماتى بحال ولدك وقطع عليه التلفون،أنا ملي سمعت هاد الهدرة تمنيت الموت مبقيتش قادرة نشوف فوجه دارنا وخى الخطئ مشي ديالي ولكن حاسة بالشمتى كنقول علاش دار ليا هكا شنو درت ليه فاش غلط معاه 100سؤال فراسي معندو جواب .ماما بدات كتصوني على كاع الناس لي عرضات عليهم كتقول ليه سمحو لينا العرس تأجل ‼️مهم هاد السيد جاء خربقنا وزعزع الإستقرار ديالنا ومشى غبر .
سلات العطلة وخاصني نرجع لخدمتي وكاع الزملاء ديالي فالعمل فراسهم بلي أنا غذي نتزوج ،لي تلقيت معاع كيقول ليا مبروك كنطر نكدب ونعطي شي عدر. مهم عشت واحد الحرب داخلية ربي بوحدو لي شايفها مقدرتش ننسا هاد الشمتا المشكل هو أنني معرفش شنو هو السبب لي خلاه إحطم مشاعري بحال هكا .
داز عام على هذشي وباقي منسيتو وليت معقدة من شي حاجة سميتها الزواج .على كل حال كنحاول نبرى ونخرج من هذه الأزمة النفسية .كما قلت لكم داز عام وجاء الصيف .خويا كريم عندو العرس غدي إتزوج غير جيت لدار لقيت ماما وبابا كيوجدو للعرس ديال خويا حسيت براسي رجعت لنفس لحالة لي كونت فيها بحال إلى هاد العرس حيا ليا الأوجاع من الجديد ،ماما عاقت بيا حولات تصبرني وتفهمني بلي هاد السيد مفيهش لخير ليا 💔.ماما قالت ليا واش عردتي على صحبتك زينب وماماها قلت ليها رني فاش كنت فالخدمة كنصوني ليها تليفون 📞 ديالها تافي غنمشي نشوفها فدارهم ‼️الغد مشيت باش نعرض على صحبتي كنتفجئ بمامها كتقول ليا راها مسافرة قلت ليها فين قالت ليا لشمال ،مامها دوات معايا بواحد الطريقة خايبة مفهمتش علاش إستغربت صحبتي مكتخبي عليا والو ⁉️تاح ليا العجب فيها حتى مامها ملي سولتها على نمرت زينب الجديدة قالت ليا ممقيدهاش ‼️
مهم داز العرس وكلشي داز كزيان عروست خويا كريم جات عندنا لدار وخويا كريم سافر لأكادير باش إكري أيفرش مرى مكرى جاء دى مراتو ومشى إرجع لخدمتو في أكادير.
أنا بقيت شوية مع دارنا حيت قريب الحال كيما كتعرفو سطات وكازا قرابين هيا هديك واحد نهار أنا كندور فالمدينة بالطموبيل وأنا نتلقى مع منعم والصدمة الكبيرة كانت معاه صحبتي زينب شاد ليها في يدها وركبو الطموبيل أنا مفهمت والو كنقول واش كنحلم تبعتهم هما غاديين وأنا موراهم حتى وصلو حدا واحد الدار هيا حلات لباب وتلعات وهو حل باب 🚪 الكراج كيدخل الطموبيل هنا عرفت أنهم مزوجين 😰💔منسيتش الغدر ديالو هو حتى زاتني صحبتي من الطفولة.رجعت لدار مصدومة 😳 قالت ليا ماما ملكي قلت ليها تلقيت زينب قلت مزيان فين غبرات قلت ليها لقتها مع رجلها قالت ليا أولي إمتى تزوجات قلت ليها منعرف قالت ليا ناري تزوجات ومقالت ليك والو قلت ليها الصدمة هي ملي غتعرفي شكون رجلها قالت ليا شكون واش شي واحد كنعرفوه قلت ليها منعم 😱قالت شكون منعم⁉️قلت ليها منعم الشماتى لي خوى بياا ماما بقات مصدومة 😳 شويا قالت ليا الله كبير مديريش فبالك أبنتي دبا إجي ولد الناس لي غينسيك فكلشي غير فوضي أمرك لله 👌☝🏻.
على كل حال رجعت لخدمتي وقررت نفتح صفحة جديدة ونسمح لراسي لبناء علاقة جديدة مع راجل لي كيستهل .وتعلمت بزاف ديال الحوايج من خلال هاد التجارب الخيبة في الحياة تعلمت أن مشي كاع لي كيضحك فوجهك كيبغيك وتعلمت بلي كاينين ناس قلوبهم خبيثة وكيستمتعو بأوجاع الأخرين 😰.
سلات الدورة الأولى من الموسم الدراسي وكيف العادة مشيت عند ولديا ندوز معاهم العطلة.واحد نهار غدى لسوق بطموبيل خرجت ليا واحد المشا قدامي فرنيت على غفلة الطموبيل لي مورايا دخلات فيا فرنيت حبط السيد قال ليا فرنتي على غفلة قلت ليه خرجات ليا مشيشة قدامي مهم قيدنا كوسطا وكل واحد مشا فحالو .الغذ كتصوني ليا واحد النمرة جاوبت قال ليا السلام رديت عليه السلام شكون معايا قال ليا أنا داك السيد لي درتي معاه كسيدة لبارح إستغربت قلت ليه منين جاتك نمرتي ⁉️قال ليا هزيتها فدوسي ديال الكوسطى قلت ليه مرحبا كاين منقضيو قال ليا بغيت نشوفك ضروري قلت ليه علاش ياك لباس قال لباس ولكين ضروري نشوفك ونهضر معاك،قلت صافي لعشيا نسالي نصوني ليك قال ليا صافي.لعشيا صونيت عليه دارت معاه نتلقاو فواحد القهوة فالمدينة مشيت قال ليا صافي واخاا مشيت وأنا خايفة ومستغربة شنو بغا هاد السيد لقيتو كيتسنا فالقهوة،جلست قلت مهم لباس بخير قلت ليه مرحبا شنو بغتيني ؟أول حاجة قال ليا واش نتي مزوجة ولى مرطبتة دحكت وقلت ليه هادشي لاش بغيتيني قال ليا صراحة فاش شفتك عجبتيني إلى قبلتي بيا نتعارفو وميكون غير الخير نشالله .مهم هضرة جابدة هضرة قنعني وقلت ليه مشي مشكل نتعارفو 😊مشيت فحالي وبقينا كنهدرو فتلفون مهم كنتعرفو هو سميتو رضى خدام موضف في البنك الشعبي، مهم بقيت أنا وياه فعلاقة لمدة 8أشهر حتى تعرفنا على بعضنا مزيان .حتى لواحد نهار قال ليا بغيت نجيب ولديا ونجي نخطبك قلت ليه مرحبا ،قلتها لدرنا ماما قالتها لبابا فرحو ليا بزاف ملي نويت نتزوج ونسيت ديك التجربة الفاشلة الأولى.تفهمنى على موعد 📅 الخطوبة جاب دارهم وداز كلشي بيخير وعلى خير،تفقنا في الصيف نتزوجو غير أنا كان عندي شرط واحد لي هو مندروش العرس رضى ملقيتش معاه مشكل قال ليا مزيان دكشي لي غنخصروه فالعرس نسافروا بيه .رجعت لخدمتي وبقينا أنا وياه فتواصل عبر الهاتف،مهم سلا الموسم الدراسي وجيت لكازا عند دارنا ،قلت لماما متعلمي حتى واحد حتى ندير العقد قالت ليا صافي مهم مشينا درنا العقد عطاني صداقي ودرنا حفلة 🎈 صغيرة بنتنا حنا العائلة وداز كلشي مزيان الحمدلله خويا كريم جاء هو ومراتو ،مرات خويا كانت حاملة وكانت الفرحة 🎈ديال ولديا كبيرة بزاف 😍ملي تزوجت تدخل ليا رجلي وخديت الإنتقال وجيت لكازا وستقريت مع رجلي رضى وكلشي كان بيخير وعلى خير رضى نساني المأساة لي دازت عليا وليت كنبيغ بزاف وحتى هوا كبغيني الحمد الله.
واحد نهار أنا راجعة من الخدمة بطموبيلتي فإذا بواحد الطموبيل تبعني وكتكلكصوني عليا وقفت جنب الطريق نشوف شكون؟ لهبط عندي منعم قال ليا بغيت نهدر معاك 5دقائق قلت ليه ممسلياش بقا لسقني قلت ليه قول شنو عندك قال ليا زينب تلعت غدارة دحكت قلت ليه غير هيا لي غدارة ⁉️قال ليا هيا سباب باش تفارقنا قلت ليه أنا وياك متفرقناش نتا هربتي وخلتيني ودحكتي عليا أنا وعائلتي قال ليا نتي أصلا مكتبغينيش زينب سمعاتني التسجيل ديالك فالواتساب وأنت كتقولي ليها أنا كاع مكنبغيه دكشي علاش مشيت 😳قلت ليه أنا ديك الهدرة قلتها ملي يلاه تعرفنا فالأولى وزيدون كون كنتي راجل غتوجهني ودابا هاد الهدر زايدة ناقصة حيد من طريقي ،قال ليا زينب فالحبس 😱قلت ليه مالها شنو دارت وخا مكيهمنيش قال ليا لقيتها كدير فيديوهات إباحية وكتبيعهم لواحد خينا براا 😱قلت ليه مكيهمنيش الله قال الخبيتون للخبيتات 👌قال ليا عتيني فرصة دحكت وقلت ليه أنا مرات الراجل مزوجة 💍وحتى كون كنت ممزوجاش مستحيل مزال تجمعنا شي حاجة سير الله إعاونك.شاف ليا في يدي لقاني ناقشة ولابسة خاتم ديال الزواج حدر راسو وقال ليا سمحيليا بزاف معمري مغنسمح راسي على دكشي لي درت معاك .قلت ليه حتى إلى أنا سمحتك الله مغيسمحكش .مشيت وخليتو واقف بلاصتو، الصراحة كنت محتاجة نعرف الحقيقة باش نرتاح عرفت بلي صحبتي هيا السبب فكاع دكشي لي وقع ليا ،مكنبررش فعايلو هوا حيت حتا هوا غدار ومشي راجل حيت الراجل كيواجه.
الحمدلله أنا دابا عايشة مع رجلي بيخير وعلى خير عندي بنيا سميتها رئية الحمدلله ربي عوضني وجزاني على الصبر ديالي .إن الله مع الصابرين 🤲🏻